تیراختورون حذف اولماغی اوزوجو دئییل / کرار جاسیم سوچلو دور؛ آما.

تیراختورون حذف اولماغی اوزوجو دئییل / کرار جاسیم سوچلو دور؛ آما..

تیراختورون 120ده‌یقه سالدیرماغی، آما پئنالتی ووروشلاریندا اله‌نمه‌یی ائله‌ده اوزوجو ( اومود سوندورَن ) دئییلدی. منجه‌ چوخ‌دا یاخشی اولدو حذف اولدو؛ تکجه بو حذفی اویونلارین ایپنه اودون دوزمک یانلیش‌دیر. اومودلرین باغلایاجاقدیلار فینالی آلتی آی‌دان سونرا قورولان حذفی اویونلارا. دوزدور گئنه‌ده تئهران‌دا بؤیوک تاریخی بیر یاریش‌دا استقلال، یوخسا پیروزی، اولاجاقدیرلار تیراختورون قوناغی، آما بو فئدراسیون‌دان هر ایش دئسه‌ن چیخار؛

یازان: آیدین ک

---

فینال اویونوندا گئچن ایل کیمی ایشیقلاری سؤندوروب و باشقا پیشیکلر ده به‌زه‌یه‌ردیلر. هله بو آرادا لاپ اوزوجو اولای تبریز تیلویزیونون شبئه چیخارتماغی ایدی. سـکسن دوخسان ده‌یقه‌دن سونرا پارازیتلر بیتندن سونرا آرتیریلمیش یاریم ساعات‌دا بو صفر تبریزین اؤزوندن صحنه‌لر کسیلیردی! من‌ده تئز ووروردوم تبریز رادیوسونا آما تبریزین رادیوسوندان دا سس گلمیردی. جالیب بو ایدی کی لاپ حساس بؤلوم یانی پئنالتی ووروالان چاغ خبر دئیه‌ن چکیشدیریب باشلادی باشقا قونولاردا خبر وئرمه‌یه؛ حالبوکی شبکه اوچ خارجی اویونلاردا بو ایشی گؤرمور! گؤردوم بئله‌دیر ایسته‌دیم تیلویزیونو سؤندوروب گئده‌م اینتئرنئت سوراغینا.

دوزون سؤزو پئنالتی وورماق‌‌دا ضعیف تیمین روحیه‌سی گوجلو تیم‌دن چوخ اولار. حدس وروردوم تیراختور اوتوزاجاق. تیلویزیونو سؤندوره‌نده گؤردوم خبر کـسیلدی پئنالتی‌لاری گؤسته‌ریر! سانکی ترشیز پئنالتی‌نی تونازلادی ملوانین تبریزده کی یوخ، بلکی انزلی‌ده کی قاپی‌سینا! ملوانلار تؤکولدولر مئیدانا ایگیرمی‌مین تیراختورچو قارشی‌سیندا شنلیک ائدنده، من‌ده تیلویزیونون انگین باسدیم.

او آنلاردا یولداشلارین بیری‌سی ایله اس‌ام‌اس‌له‌شیردیم بو اوزوجو اولایا گؤره! سؤز قونوسو دا کرارین اولماماغی‌نین ضربه‌سینه گؤره اه‌له‌نمک، کمالوندین هم بئینی و هم‌ده نیمکتی‌نین بوش اولماسی و ... ایدی! او دئییردی من بیلیرم تیراختورون داشی آتیلیب! من‌ده دئییردیم یوخ بابا گؤردویوموز اویون چیخارتمالار، پاخیللیق‌لار، یئرسیز محروم ائتمکلر و اؤجه‌شمه‌لر اونلارین داشی‌نین آتیلماسی‌نی گؤسته‌ریر. منجه بو باشاری‌دیر: "تیراختورون اؤزونو محروم ائده‌بیلمیرلر؛ یاپیشیبلار عیراقلی اؤیونجوموزون خیرتده‌ییندن اؤتورمورلر. حالبوکی دونن‌کی اویون‌دا گؤردوک کرارسیز تیراختور 120 ده‌یقه سالدیردی تکجه قول وورمادی


ملوان اویونون فیکریندن چیخمامیشدیم، ایدمان خبرلرینه قولاق آساندا، ائشیتدیم یازیق کرار جاسیمه بیر باشقا جزا یازیبلار. دئییبلر سهند ایستادیومونون ایکی-اوچ مین صندلی‌سی‌‌نین سیندیرلماغی‌نین نه‌ده‌نی کرار جاسیمین تحریک ائدن ایشلری‌دیر و او گرک بونون خسارتین‌‌ده وئرسین! په هووووو! بس بونلار چوخ دوزگون و سیستئمی فیکیرله‌شیرسه‌لر نه‌دن اصل تحریک ائدن پیروزونون لات اویونجوسو، و داورلری‌نین ثابیت اولونموش یانلیشلیقلاری‌نی نه‌یه جزالاندیرمیرلار؟

منجه بو یئنی جزا تاماشیچلار و اونلارین سئودیکلری اویونچونون آراسینا بولاندیرماق قصدی ایله اولوبدور. کرار جاسیم دوزدور بیر یانلیش ایش گؤروب و اؤز هه‌یه‌جانی‌نی کونترول ائده‌بیلمه‌ییب آما اونو هامی سئویر. او قدر جمعیت قارشی‌سیندا چوخ چتین‌دیر حاقسیزلیق و عدالتسیزلیگی دؤزه‌سن. بیز ده مئیدان قیراغیندا دوروب راحاتلیقلا قضاوت ائده‌بیلمه‌ریک. تکجه دئیه‌بیله‌ریک یاخشی ایش گؤرمه‌ییب و بوندان سونرا گرک داور سؤزونه قولاق آسا و تیمه ضربه وورمایا.


بو آرادا ایسته‌ییرم لاپ اصلی موقصصیرلری سیزه تانیتدیرام. صندلی سیندیرماغین عامیللری نه پیروزونون لات اویونچولاری، نه یاریشین یانداش آراجی‌لاری، نه پولیس‌لر، و نه صندلی سیندیران هوشو باش‌دان چیخان تاماشچیلار ایدیلر. موقصصیرلر سیندیرانلارین یانیندا اولان صندلی سیندیرانلارا دیلله‌نمه‌یه‌نلر ایسه دئییلدیلر! قوصور من کیمی تاماشاچیلاردا! "سیندیرمایین" سس‌لری‌نی چوخ اوجا چیخاردابیلمیرلر؛ یا ایستادیوما گئج یئتیشیب یوخاری طبقه‌‌ده اوتوروبلار او های‌کوی‌ده بئله عیللتلی وندالیسمین پیسلیگینی قاندیریب، قاباغینی آلابیلمیرلر یوخسا ائو ده اوتوروبلار تیلویزیون یا اینتئرنئت‌دن ایزله‌ییب هر نه‌یی اله‌شدیریرلر.

من‌جه سینیق صندلی‌لرین سایی‌سی 2000 اولورسا 10000 نفر ده من کیمی دوشونسه بیزلر بو خسارتی اؤده‌مه‌لی‌ییک. صندلی‌نین بیری‌سی 5000 تومن اولسا هره‌میز مین تومن خسارت وئرمه‌لی‌ییک! کرار جاسیم ده لوطف ائله‌سین شوماره حیسابین دئسین هره‌میز 1000 تومن تؤکه‌ک حیسابینا. او نئچه اویون اولسا یئتر. مالی خیسارتی‌دا وئرمک ده بیزیم بوینوموزا. وارلی-دؤولتلی اولسایدیم بوتون اون میلیونو اؤزوم وئره‌ردیم. آنجاق ایستادیومون سوروملولاریندان دا بیر ایستک واریم. لوطف ائله‌سینلر "فهیم" آدلاندیردیقلاری تاماشاچیلارین صندلی‌لرینه اویونلاردان اؤنجه بیر کؤهنه‌دن دسمال‌دان چکیب تؤز-تورپاغی‌نی سیلسینلر. یوخسا بو بیلیت پوللاری حلال خوشوز اولماسین اینشاللا