دئیه‌سن حاجی فتوللازاده‌نین‌ده قازاندیغی چؤرک حلال‌دیر

هواداران تراکتور آذربایجان

دئیه‌سن حاجی فتوللازاده‌نین‌ده قازاندیغی چؤرک حلال‌دیر

تیراختور-ایستیقلالین بازار گونو یاریشیندان سونراکی توز تورپاق سانکی یاتماق ایسته‌میر! اویون آراجی(قاضی)‌سی‌نین تیکراری و عَمده اوخشار یانلیشلیقلار و عدالتسیزلیکلری تاماشاچیلارین تپکی‌لری، و سونراکی حاشیه‌لره بیر نه‌دن ایدیلر. ایش اورا چاتیب کی تیراختورون سس‌سیز باشقانی، سردار جعفری‌ده دیله‌ گلدی و شیددت ایله اعتراض ائتدی کی بو نه اویون‌دور چیخاردیرسینیز؟ استقلالی ایندی‌دن قهرمان ائتمک قصدلری واردیر سانکی!

و بو تارتیشمالار یاواش یاواش تئهرانین باشقا تیمی، یانی پئرسپولیس-تیراختور و پئرسپولیس-بلدیه آراسیندا اورتایا چیخان حادثه‌لره بنزه‌ییر. بو بنزه‌مه‌یی، هم پئرسپولیسین و هم‌ده ایستیقلال‌دا آدلیم تورک آداملارین اولماسینا گؤره دئییرم. بو بیر-ایکی ایل‌ده چوخ عجیب ایدی کی تیراختورون موتورو قیزیشاندان سونرا آدلیم تورک فوتبول آداملاری، فوتبول‌دان قوولموش اولاراق، بیردن بیره تئهرانین قیرمیز و گؤی تیم‌لرینده اصلی نقشه صاحیب اولدولار! دایی‌نی ایرانین میللی تیمیندن چیخاتمیشدیلار و خوی‌لو حاجی فتوللازاده ده چوخ‌دان ایدی ایستیقلالین قاپی‌سینا یاخینلاشابیلمیردی! آما ایلک‌ده دایی باغیشلاندی و گلدی پئرسپولیسین باش مورببی‌سی اولدو، و نئچه آی سونرا دا حاجی فتوللازاده ایستیقلالین باش سوروملوسو اولدو. دایی‌ و تیراختور یانداشلاری‌نین آراسیندا گئچمیش سوره‌ج‌دن هامی‌میزین خبریمیز واردیر. تبریزه ایلک‌ دؤنه گئده‌نده آلقیشلاندی، آما گئت‌گئده یئرسیز دانیشیقلاری و یانلیش داورانیشلارینا گؤره هویلاندی! حاجی‌ فتوللازاده‌نین گؤزلری آلتیندا اداره اولونان ایستیقلال‌‌دا تبریزه گئدنده ایلک‌ده آلقیشلاندی؛ چونکو هم حاجی فتوللازاده تورک ایدی و هم ایستیقلالین مورببی‌سی یانی مظلومی جاوانلیقدا تیراختوروچون اوینایاردی. دوزدور اویونون سونوجونو آراجی ده‌ییشدی، آما تاماشاچیلار تکجه فئدراسیونون علئیهینه شوعار وئردیلر، و بیر داها ایستیقلاین مورببی‌سی‌نی آلقیشلادیلار. آنجاق اویوندان سونرا کی دانیشیقلار یاواش یاواش هر نه‌یی ترسینه ائتمه‌یی آدامی قورخودور. تیراختورون مورببی‌سی آیدین یانلیشلیقلاری آچیقلاییب اعتراض ائتمه‌یه حاقلی اولسالاردا ، ایستیقلالین دولاندیرانلارین یئرسیز دیفاع ائتمکلری هئچ، اؤزلرینی تبریزده مظلوم اولماقلاریندان دانیشماق چوخ گولونج‌دور. ساده‌جه دئسه‌لر بیز واللاه تقصیرسیزیک، و هر نه داورین بوینونا دیر آدام یانماز. آما قاباق‌دان گلمیشلیک ائدیب دئییرلر آراجی گرک تیراختورون فیلان ایونچولارین ایخراج ائدیب و پئنالتی‌لاری‌نی توتمایاردی.

البته تکجه تیراختور یانداشلاری دئمیرلر بیزیم قولوموزو داور حیسابا قویمادی. یاریشدان سونرا کی گون، فوتبول3 سایتیندا کی سئچگین گونده‌لیکلر تیراختورون حاققی پوزولماق‌دان دانیشیردیلار(تکجه ایستیقلالین رسمی گونده‌لیگیندن سونرا). البته اونلار تیراختورون آلا گؤزلرینه عاشیق دئییل‌دیلر و بیر بهانه تاپمیشدیلار پئرسپولیس‌دن دیفاع ائتمه‌یه گؤره! ایکی هفته بوندان اؤنجه‌ده گون نم هاردان چیخمیشدی، پئرسپولیسین ایستیقلالا ووردوغو قول حیساب اولونمادی و اونلار آللاه آللاه ائدیردیلر تیراختورون کیمی چوخلو یانداشلی تیمینده اوخشار حال‌دا حاققی پوزولسون.

ایکی گئجه بوندان اؤنجه دوخسان وئرلیشین داورلیق اوزمانی تیراختورون بیر قولو یوخ، بلکه بیر باشقا آفساید تانینمیش قولونون دوزگون اولمادیغینی اونایلادی(تایید ائله‌دی). سونرا حاجی فتوللازاده‌یه دانیشماق نووبه‌سی یئتیشه‌نده، دوردو باشلادی کی یوخ اصل‌ده بیز گرک اعتراض ائدک؛ فیلان صحنه‌نی نه‌دن گؤسته‌رمه‌دیز؟ دانیشیقلاریندا تعاروف ایچین دئییر تیراختور دا اؤزوموزنکودور و منیم همشهری‌لریمین تیمی‌دیر؛ من اؤزوم تیراختورا چوخلو یاردیم ائتمیشه‌م و بیز لاپ سئوینه‌ردیک تیراختور اوتسایدی! آما سؤزون آردیندا بئله تیراختورا سالدیریر آدام قالیر معطل! آدام دئییر هر کیمسه حاجی فتوللازاده‌نین یئرینه اولسایدی، دئیه‌ردی بابا حاق سیزینله‌دیر. یانلیش‌دی اولوب گئچیب‌دا! آما اصل‌ده پئرسپولیس‌دن دیفاع ائتمک ایچین بو دؤنه تیراختورون یانداشی اولان فئردوسی‌پور، آخیر دا اوز دن گئتدی و حاجی دئیه‌ن صحنه‌نی ائکرانا گتیردی.

دایی تیراختورون علئیهنه‌ دانیشاندا، موغالیطه ایچین بیر سؤزو چوخ دئییردی. دئییردی کی "منیم چیخارتدیغیم چؤرک حلال اولمالی‌دیر"! آما حاجی فتوللازاده علی دایی‌یا گؤره سیاستلی و منطیقلی داورانیر. دئیه‌سن حاجی فتوللازاده ایسه بونو دئمک ایسته‌ییر. بیری‌سی اونا دئسین سن کی آراجی یاردیمی‌ ایله آز قالدین اوتاسان و سون‌دا دا موساوی سونوجو آلیب تبریزدن اکیلدینیز!! دای نه‌یه دامین او باشیندان دوشورسن!؟ بللی دئییل آزربایجانا آز قوللوق ائتمیش تورکلر، بئله چاغلار نه‌یه حلال قازانماقلارینی بیلدیرمک ایسته‌ییرلر؟!
آیدین ک